ورقة الغش الرسمية للراغبين في الزواج من أردنية

كتبت المرة الماضية عن مفاتيح معرفة الزوج الاردني (للمقبلات على الزواج) و الآن للانصاف و بناء على رغبة الجماهير التي احتشدت أمام بيتي أكتب عن المفاتيح الرئيسية للفتاة الاردنية من وجهة نظري الشخصية  لمساعدة الشباب المقبلين على الزواج. و الله من وراء القصد (بالعربي الله يستر من التعليقات بعد قراءة المقال)

 ما سأكتبه هنا لا ينطبق على جميع الاردنيات و  بعض الاردنيات تحمل بعض من الصفات ادناه و ليس كل الصفات و بعض البنات مثاليات و الله يخليهم لاهلهم و ازواجهم، تماما مثل صفات الشاب- فكلنا بشر و عند كل واحد فينا كوكتيل من الصفات- يعني مثلا بتلاقي شاب بخيل رومنسي و بنفس الوقت لئيمJ. و للإنصاف ايضا، ما يلي لا يقصد فيها الانتقاد لأحد و لا انعكاس لشخصية اشخاص معينيين او شعور شخصي من تصرفات أي احد، فلا داعي للتصنيف و القدح و الذمJ

  1. الجمال و اكسسواراته: احذر احذر احذر (و اقولها ثلاثا) تقول عن خطيبتك\مرتك انها مش حلوة او حتى فستانها مش حلو و الاكثر مصيبة شعرها مش حلو… اسمع مني و صدقني… و حتى لوكان شكلها طربيزة ظل قول عنها حلوة. الأهم من كل هذا: لا تخليها تجرك بالحكي عشان تنتقد اي من عوامل الجمال عندها. مثال: “حلو  هاد الفستان؟” “المكياج هاد حلو ويللا معجق؟” “أمك بتحب البس هاد البطلون و يللا هداك؟” في حال توجيه هيك أسئلة حاول تغيير الموضوع، اهرب من البيت، اعمل حالك اطرش.. اي شي المهم ما تجاوب. ينطبق الكلام عند الخروج من المنزل و انتظار جهوزيتها للطلعة “يللا خلصينا تأخرنا” اوعا تحكيلها هيك. الحل: لمّا تقرروا تطلعوا حط فيلم DVD و احضره حتى هي تخلّص لبس و مكياج.
  2. الانتقاد و الاسئلة: لا تنتقد، لا تنتقد، لا تنتقد… حتى لو كان الانتقاد هادف و بنّاء و في محلّه.. ما بتفرق للعلم اذا كنت على حق او لأ. الحل لهذا الموضوع بسيط: قم بحل المشكلة بنفسك بدون ما تفتح السيرة معها و لا تناقشها بالموضوع. مثال: اذا اشترت شغلة غالية على الفاضي، لا تستعملها و لا تتطلع عليها (مزهرية مثلا)… اوعا تقوللها: “ليش اشتريتي هاي المزهرية ام الـ200 دينار!!!”
  3. المديح المتواصل بسبب و بدون سبب : هاظ الإشي سحر!! ظل قوللها “انتي حلوة، انتي شاطرة، انتي ملاكي، انتي حياتي، يا قمر، يا شمس، يا مريخ”… طبعا لازم تقول هيك حكي لسبب وحيد و بسيط: تقليل مشاكلك و وجع راسك بس.
  4. الهدايا: السحر الثاني!! ظل اعطيها هدايا بسبب و بدون سبب، و مش شرط اشي غالي (ابتعد عن الورد- شغلة سخيفة هاي) جيبلها ان شا الله حبّة تويكس كل يومين- بتشوفها قد الدنيا- طبعا لازم الهدية تكون مرافقة للكلام الوارد في النقطة السابقة. الهدايا برضو بتحل كل المشاكل- كل ما كانت المشكلة ثقيلة لازم تكون الهدية أثقل. قصة حقيقية: شاب مسكته مرته في وضع ” بدون تفاصيل”… اعطاها طقم ألماس و كأن شيئا لم يكن… لا تفهموني غلط رجاءً من هاي القصة.
  5. أمها (حماتك)- احترم أمها اكثر منها، شو ما تعمل امها فيك خليك ارنب و قول حاضر- عجبك ما عجبك مشكلتك الشخصية و حلّها لحالك. للعلم: البنت بتفتح كل اوراقها مع امها، فاذا قالتلك شي يوم “ماما ما بتعرف” اظحك بعبّك و قولللها: “عن جد؟؟ هسا بحكي معها و بحكيلها”. ملاحظة: اذا حماتك ممتازة اعرف 100% انو حياتك رح تكون سعيدة، و اذا حماتك “بتحبّك” زي ما بقولو فانت في أمان.
  6. الطموح: كل وحدة بالبلد صار بدها تتعلم و تشتغل و تفتح مطعم و شركة و تكون وزيرة.. و هذا شي كويس للعلم و مش غلط، بس اذا تجرأت حضرتك و تناقشت معها بالموضوع (راجع النقطة 2) بتشحطك على حماية الاسرة و السفارة الامريكية و منظمات حقوق الانسان و بتقول عنك حابسها بزنزانة من يوم العرس. نصيحة: خلّيها تعمل اللي بدها اياه- شو خسران انت اصلاً؟ اذا هي اكلت مقلب بطموحها ما بكون الك اي دخل (الا اذا لبّستك سبب من هون او هون و انت مش عارف)
  7. الحقوق و الواجبات: كل ما تعرفه من حقوق و واجبات من الكتب السماوية و كتب نصائح الحياة الزوجية كلها جميلة و صحيحة و رائعة و لكن للأسف مستحيلة التطبيق و مفهومة عند الكثير بمعاني و تفسيرات مختلفة حسب الزمن. يعني جدّي و جدّتي كاوا يفهموا الحقوق و الواجبات غير عن الزمن الحاضر فبلاش تعمل فيها الانسان المثالي و تقول حقوقي كذا و واجباتي كذا- ممكن جداً إنّك ترضّع هاي الايام رضاعة طبيعية… عادي لا تتضايق.
  8. الحوار و النقاش.. دير بالك، كل قصص الحث على التواصل بين الزوجين و اتباع سياسة العقل المنفتح و التفاهم و التضحية المشتركة عبارة عن وسيلة لجعلك أنت (او هي) في خانة المذنب او الغلطان و عليك (او عليكي) تصليح الاخطاء.. فبلاش قصص الحوار من اولها- الحل ببساطة بالافعال لا بالكلام و النقاش- يعني اذا في شغلة مزعليتك ابلعها و طنّش و حاول (حاولي) حل سبب الزعلة مع الزمن
  9. النظافة الشخصية… تماما مثل ما ينطبق على الشاب، لا تفترض انو البنات كلهم بلمعو لمع.. مش شرط اذا مكتبها بالشغل عليه ورد و كريمات و ريحتو حلوة اوتوماتيكيا معناه انو غرفتها مرتبة او  ما تحت طبقات المكياج و الملابس بلمع لمع.. اذا لا سمح الله وقعت بهيك مطبّ ما عليك الا ان تصبر و الك الجنة ان شاء الله (ينطبق الكلام على الشباب كما ورد في المقال السابق)
  10. الطبيخ… بالمختصر المفيد.. غالب (و ليس كل) بنات البلد ما بعرفو يطبخو، إما تدليع من امهاتهم، او اعتقادا من البنات انو الطبخ (و النفسية الحلوة في الطبخ) هو نوع من انواع الاستعباد للمرأة، او انها مشغولة طول وقتها بالدراسة و الشغل و بترجع هلكانة و ما في وقت تطبخ او تتعلم الطبخ في فترة صباها. طبعا نظرا لهذه الظروف صارت بعض “الاكلات” تسمى طبيخ مثل: لازانيا، المناقيش، سلطة، سمبوسك… الووووو هاظ مش طبيخ!!! حل هاي المشكلة يأتي مع الزمن، رح تتعلم العروس الطبيخ بفترة قصيرة (يعني شي 10 سنين) و حتى ذلك اليوم تغدّى عند اهلك او اهلها او بالمطاعم.. الله بعينك
  11. الـ “إحم”… بستحي احكي بالموضوع، بس بالعموم: البنات ما بيفكرو بالموضوع بالبساطة البريئة مثلك يا شاب. الموضوع معقد و له manual من 400 صفحة… و اذا بتفكر هي مثلك بالـ “إحم” غنّي بعبّك… هيو هيفنر خالك (ابو زيد)

بالنهاية.. مبروك للعروسين و بالرفاه و البنين

7 thoughts on “ورقة الغش الرسمية للراغبين في الزواج من أردنية

  1. أخي خالد، تعجبني صراحتك، وكلامك ينطبق على 99.9999999% من الحالات
    أكثر شي مزبوط هي قصة الحوار والنقاش، وحل المشكلة عن طريق الأفعال لا الكلام

    وانا مقتنع مليون بالمية بالكلام يلي انت كاتبه، واصلا هذا هو طريقة تفكيري قبل ما اقرا كلامك حتى، مقتنع انا بهاي الفكرة

    لكن ما بعرف ليش…في شي داخلي قوي كتير بقول لي، انو انا وقت اتجوز، رح اتجوز البنت يلي هي 0.00000001% من المجتمع، يلي رح نقدر نحل مشاكلنا بالتفاهم والحوار والنقاش
    يلي رح تتقبل النقد…..يلي ويلي ويلي….يمكن هذا الشي يكون من محض الخيال، او من كثر ما بشوف افلام امريكية وقصص حب و و و
    لكن عندي هيك احساس قوي….رغم اني كنت خاطب من شي 5 سنين، وفسخت الخطبة..دامت خطبتي 6 اشهر…وطبعا لا كان ينفع النقاش ولا كان يفنع الحوار….لكن ضليت حاول……حتى باءت جميع محاولاتي بالفشل….بالآخر ما يصير غير يلي كاتبه رب العالمين

    ومقالة حلوة وعجبتني🙂

  2. أوك لنفترض كلامك صح… إذا كانت هذه الورقة ملزمة لشباب الأردن والله والله ما حدا منهم بتزوج … يا عمي هذه الورقة للمتهكمين الي يلومون فشل علاقتهم على الست … والله أعلم😉

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s