الخطوات العملية للتعامل مع الانتخابات النيابية

 يبدو ان الانتخابات ستحصل عاجلا ام آجلا… سواء في نهاية هذه السنة او اوائل السنة القادمة، رح تكون بنص فصل الشتاء سواء الحملات الانتخابية او يوم التصويت (تخيلو تثلج يومها:-)) المهم ان من سجل للانتخابات قد يذهب للتصويت او يظل قاعد بالبيت لأنه رح يكون يوم عطلة.

بما انك مسجل للانتخابات عيش الدور شوي، يعني لا بأس ان تتعامل مع الحملات الانتخابية للمرشحين في منطقتك بطريقة مختلفة عن المرات الماضية، يعنى سؤال بسيط: ما زهقت نفس الاسطوانة انو واحد من قرايبك او صحابك نازل على الانتخابات و تروح مثل الخاروف تنتخبه انت و امك و ابوك و بالأخير يسقط او ينجح و لا يحدث شيء بعد ذلك. فإن سقط قريبك (او شيخ العشيرة او زنقيل العشيرة) رح يقوم بدور رئيس بلدية منطقتك (توظيف فلان، نقل معلمة من مدرسة بعيدة لمدرسة جنب الدار، يعطيك معلومة عن ارض رح تدخل التنظيم بعد 10 سنين، تدبير بعثة لابنك.. الخ) و إن خسر الانتخابات رح يظل يتفعفل و يسب و يطلع ضغطه كام يوم بعدين بتشوفو بيسقي الزريعة بالجنينة و بعدين بيرجع طبيعي زي ما كان قبل الانتخابات.

شو رأيك تتعامل مع الحملات الانتخابية القادمة بطريقة غير هاي السنة؟ اليكم النصائح التالية… و اذا ما بدك نصائح بلاش… عادي.. بالنهاية انا مجرد زر بقميصك عزيزي القارئ

  1. المناسف و الكنافة: لا تتهاون و لا تتكاسل في استغلال الموقف بس مش بالطفاشة و الدفاشة….. يعني اذا ما أكلت بوحدة من الخيم الانتخابية لا تزعل و تحرد.. اذا زبطت معك و اكلت ارميلك كلمة مثل “لااا كنافة فلان مبارح ازكى” او “ما انتفو اللحمة روماني” على سمع المرشح او قرايبه. العبرة منم استغلال الموقف: هاظ المرشح حابب يكسب صوتك بالأكل و الشرب، اوتوماتيكيا لازم يسقط من عينك و لو انه يدّعي الكرم و الشهامة. لا بأس بعمل الولائم بس السؤال “ليش ما عمل مناسف قبل سنة او سنتين بس بداعي محبته لأبناء دائرته؟؟” او ليش ما وزّع صوبات في الشتوية الماضية او اللي قبلها للأسر المحتاجة؟…. طبعا للإنصاف هناك من ابناء البلد مرشحين للمجلس او غير مرشحين ملائكة تمشي على الارض، و ان شاء الله ينزل الكثير منهم للانتخابات و ينجحوا (بقول ان شاء الله)
  2. المطالبة بالمناظرات بين المرشحين: هون شوية تغيير جو. ان تتحدى المرشحين او بعضهم بالتواجد في مكان ما مع بعض و امام ابناء الدائرة و ادارة مناظرة بينهم. طبعا قد تقول “ما رح يرضو” هاي حلّها سهل… احنا شعب بنحب الفشخرة… ما عليك الا ان تقول للمرشحين “شكلك خايف ترتبك بالمناظرة مع فلان و تسقط من عين الناس” طبعا بيقلب كيسنجر وقتها و بدقّ على صدره و يتم ترتيب المناظرة… و لا بأس أن يدير المناظرة واحد بعثي او شيوعي او اخوان مسلمين عشان تقلب مناظرة “ديمقراطية” عالمزبوط.. طبعا اختيار مدير المناظرة يتم بنفس طريقة تحدي المرشحين للمناظرة
  3. ناقش البرنامج الانتخابي: اهم شيء ان تسأل عن برنامج المرشح و ما هي خطته العملية لتطبيق البرنامج (رجاء ارمي حالك على الارض الان و اظحك لبكرة الصبح) و اسأل عن كل نقطة بالبرنامج… لا تستحي حتى لو كان اخوك اللي نازل على الانتخابات. السؤال الاهم للمرشح “شو رح تعمل اذا لم تستطيع ان تنفذ برنامجك الانتخابي سواء كتقصير منك او من ضغوطات خارجية؟” و حاول (ما بدهاش شطارة) ان تتأكد ان المرشح نازل للانتخابات للعب دور خدمي (تزفيت شارع، نقل معلمة، بعثة…) ام دور تشريعي (مراقبة اداء الحكومة و سن القوانين)… هون لازم تبكي مش تضحك
  4. المصارحة مع المرشح: لا تخاف ان تقول للمرشح ان برنامج فلان احسن من برنامجك… او… انا و عائلتي غير مقتنعين بك كنائب عن دائرتنا للأسباب التالية… حاول تكون واقعي و غير عاطفي مع المرشح… خليه يعرف ان النائب مش مزحة و دوره كبير و مهم لأسباب تهم البلد و الشعب ككل. اذا اكلت بوكس او كف مش مشكلة… على الاقل عملت اللي عليك… لا تزعل
  5. التصوير و النشر: خلّي موبايلك مشحون و خاصة اذا كنت بنقاش مع المرشح … و خليه يشوفك انك بتصور… خليه يخاف (اذا فارقة على *ـيزو اصلا) و حط الفيديو على يوتيوب و اعطيها فيسبوك و تويتر… طبعا انشر المليح و العاطل عشان تكون منصف.
  6. تربية الاجيال القادمة: اذا ولادك كبار خذهم معك يتعرفوا على سير العملية الانتخابية الديمقراطية (مش قادر ما اضحك اسف:-)) و يشوفو كيف المرشحين بيتصرفو و اسباب ترشحهم و واجباتهم اذا نجحوا… لازم الجيل الجاي يعرفو شو يصير معهم بالسنين الجاية… لعل و عسى تتحسن و تتعدل على دورهم

 

 

 

3 thoughts on “الخطوات العملية للتعامل مع الانتخابات النيابية

  1. و الله يا خالد كلام منطقي و عملي و مو صعب أبدًا

    مش متأكد من النقطة 4 + إذا حدا حينشر الجيد و السيء (نقطة 5) .. بتوقع الفظايح = طعمها أحلى و بالمحصلة حتكون إما أو مو ال 2 سوا

    ——-

    النقطة الأخيرة جد مهمة و بكفينا (مش فارقة معاي و لا حيصير إشي لأنو) .. يا أخي خلي يصير إشي صغير بعد 3 – 4 أجيال.. إذا شغلة بسيطة و مو صعبة طيب اعمل هالخطوة/خطوات ما دامها هيك.🙂

    أشكرك
    ———
    وين أول منسف “متوقع” بالمناسبة🙂

    • و لا كبير و لا اشي… اعتقد سهل و بسيط و بامكان الجميع المساهمة بتحسين طريقة اختيار النواب و متابعة عملهم بالبرلمان من قلب و رب مش تمثيل صوري و شغل واسطات و تمشاية حال

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s