يلعن أبوك كلب!

كنت في طريقي لأحد الاقارب بالسيارة في صباح يوم السبت، ثاني أيام عيد الاضحى، و أثناء القيادة حدث معي موقف في حوالي الساعة التاسعة صباحا حسب توقيت الآباء و الاجداد (العاشرة حسب توقيت الحكومة الاردنية).

كنت أسوق خلف احد السيارات و كان يمشي ببطء ممل و طبعاً صف على اليمين بدون ما يعطي إشارة (غمّاز)… مررت بجانبه و عملت حركة بأصابعي (مش أصبع واحد) على شكل غمّاز  إنو بالعربي الفصيح حطّ غمّاز… المهم شافني و انا بعمل الاشارة… فتح الشباك و قال: يلعن أبوك كلب!!

المهم انا من منطلق المقولة الدارجة “المسبّة راجعة على صاحبها” و من مبدأ الدنيا لسا الصبح و عيد و الجو حلو و بعد تجرّع عبارات التفاؤل و الايجابية اللي زهقونا فيها الفلسفجية ع تويتر و من منطلق النظر الى الجزء الضئيل الغير واضح الممتلء من الكأس طنّشت الزلمة و ظلّيت ماشي…

و بعد ما مشيت مسافة شفته بالمراية بعطي ضو عالي واطي و يضرب زامور قرقع الحارة.. وقّفت على اليمين و حضرتو وصلني بسرعة… قلت هاظ ناوي على طوشة..

المهم صار جنبي و فتح شباك اللي جنب السايق passenger seat.. معلومة صغيرة: كانت وحدة و الواضح انها بنته قاعدة جنبه (4 جيّد للمهتمين فقط)  و بلّش حضرتو يعطيني بهادل…

المذكور: شو سيدي  بتعطيني دروس سواقة؟

أنا: حقك علينا آسف.

المذكور (بلّش وجهه يقلب أحمر): بحياة الله وين مركز السواقة تبعك عشان احجز اخذ دروس عندك؟

انا: حقك علينا يا أخي خلص.. ما كان قصدي شي.

هو (ارتفع ضغطه و صار وجهه بندورة): شو هالناس هاي عن جدّ مفكّر حالك بدك تعطيني دروس سواقة؟

انا: قلنالك آسفين يا أخي.

المهم لما عرف اني مش ناوي اهاوش و لا ابلش فيه سحب حالو و هو بعدو بيسبسب.

يعني انا الصراحة كان ممكن اعمل طوشة محترمة معه و بجوز تراق الدماء من كلا الطرفين و نروح ع المخفر يوم العيد و اعمل فضيحة بجلاجل.. المشكلة انو مش قادر يعترف انو غلط و ما حطّ غمّاز و على الاقل قال مثلا “انا صح ما حطيت غمّاز بس معلش بديش حدا يعلمني السواقة بعد هالعمر” أو “انا ما بحط غمّاز لا دنيا و لا آخرة” رح اكون متفهم جداً بس إنكار الغلط و تحميل الطرف الثاني كل المسؤولية و اللوم و فوق كل هاظ مسبّة من الآخر مش قادر اهضمها..

المؤلم بالموضوع ان ما ذكر أعلاه ينطبق للأسف على مواضيع أكبر و أهم و أحد الاطراف…. “يلعن ابوهم كلب!”

9 thoughts on “يلعن أبوك كلب!

  1. والله يا سيدي هذا هو الحال في الاردن وغيرها من الدول العربيه. كان في اشي زمان اسمه عيب بس الواضح انه مافي حدا متذكره. كل غماز وانت بخير

  2. القيادة في الأرن : أغلق كافة نوافذ سيارتك صيفا و شتاء ، و قد كأنك وحيدا في شوارع مهجورة حتى تضمن رجوعك الى بيتك سالما غانما و هادئ الأعصاب

  3. شعب كلة زعما منين بدنا نجيبلك شعب .وبناءا على راي المشتغليين بالطاقة هذا شخص على درجة عالية من السلبية على عكس ما ظهر منه .وانت شخص محاط بطاقه اجابيه عالية .تهانينا

  4. اخي ، للاسف في ناس محرومة من الحكمة والتصرف الصح في كثير من المناسبات وخصوصا في المناسبات الاجتماعية والاعياد الدينية، اهم ما في الموضوع انك ما قلقت احد وعكرت اجواء بهجت العيد.

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s