بدون حلفان يمين بس قسماً بالله العظيم ثلاثا انو الشبكات الاجتماعية افضل ابتكار عملوه الاميركان للعرب… ببساطة للاسباب التالية:
قلة القراءة و ضحالة الثقافة.. او بالاحرى انعدام القراءة.. احنا و الحمد لله شعب لا يقرأ و المقصود غالب الشعب و ليس المعني مدمني القراءة و حب المعرفة من الكتب و المراجع عن حق و حقيق. و بالتالي وجد العرب منفذ جذاب لطلب المعلومة من الاصدقاء (يختي ما اشطرك انت و صحابك)… بتلاقي الواحد كاتب ع الفيسبوك “مين بيعرف شو يعني polymorphism بلييييز ساعدوني” و بالتالي الكل بيجاوب و حضرتو مفكّر حالو حدق و ختم العلم بدون ما يفتح كتاب– تفه على قولة ميريام كلنك (مستحي احط رابط للفيديو كليب– اترك لكم حرية المشاهدة)
-
العجز في استخدام الانترنت… لاحظ الاميركان أن اصابع العرب مقدسة و لا تستطيع و لا يجوز ان تستخدم الكيبورد كثيرا (كثير انبسطنا على الـ 140 حرف بتويتر).. و بالتالي اعطوهم شغلة اسمها فيسبوك عشان يبحثوا عن اي معنى لكلمة او ايضاح اي التباس في مسألة ما مباشرة من الاصدقاء– على اعتبار ان احدهم مطّلع و متعمق بالموضوع المطروح. يعني عفوا.. بدل ما تسأل على الفيسبوك “كم امتدت فترة حكم الدولة العثمانية؟” حرّك اصابعك شوي و بحبش بالانترنت شي ربع ساعة! بوعدك ما رح يصيبك روماتيزم بأصابعك.
-
قلّة الاستيعاب… استوعب الاجانب ان العرب ما بيحبو ينعجقو كثير… يعني بالعربي الفصيح علموا علم اليقين أن الانسان العربي بنعجق لما يضطر يعرف يفتح الايميل..و web browser و search engine و CNN website و موقع الجزيرة و الرأي و ايميل الشغل و messenger فا كتييير عجئا (OMG OMG) و بالتالي جاء الاختراع العظيم فيسبوك ليحل مشكلة “العجئة“) و يعطيك الصافي بموقع واحد (بقطع… امم.. ايدي، اذا عن جد فيسبوك بيعطيك الصافي) قسما بالله في ناس ما بتعرف شو هو الايميل و بحكي جد.. و لا عمرهم فتحوا ايميلهم الا لاغراض تعديلات ضرورية على مواقع الشبكات الاجتماعية
شكرا Zuckerberg و شكرا Jack Dorsey… هسا واحد بردّ عليّ ع فيسبوك بيسألني مين هظول