السياحة في الأردن- وجهة نظر شخصية

عندي مشكلة أنى مصرّ انه بالإمكان تغيير جو في الأردن بشكل ما او بآخر- حتى بدون دفع أي مبلغ من المال- مشوار على حوارة في اربد شخصيا يكفيني، او على جرش. ويمكن أيضا تغيير الجو بدفع مبلغ من المال والمفروض ان دفع مبلغ على فندق (او ما يسمى منتجع) … المفروض ان يكون تغيير جو خرافي او على الأقل محفوظ في الذكريات على أن الانسان استمتع بوقته مع من برفقته! ولكن للأسف تجربتي الشخصية مع منتجعات الأردن فاشلة (اكرر- هاي تجربة شخصية، ليست تجربتك انتJ)

لن أقول أسماء المنتجعات التي زرتها، ما أستطيع ان أقوله انها ذات خمس نجوم في البحر الميت والعقبة، وهي من الأسماء الرنّانة، وحصلت الزيارات لهذه المنتجعات منذ فترة قصيرة (يعني طازة)

  1. السعر مقابل الخدمات: صراحة السعر لا يوافق المعروض، ماشي الغرفة نظيفة وضغط الماء في الدوش ممتاز ويوجد “بلكونة” تطلّ على البحر او بركة السباحة، وهذا هو الشيء الوحيد الذي تأخذه مقابل الدفع! يعني لا يوجد عروض “مجانية” لأي من النشاطات الموجودة (ويا ريتها موجودة). لو قارنت نفس المعروض من نفس المنتجعات خارج الأردن لوجدت خدمات كثيرة مقابل مكوثك عندهم.
  2. النشاطات المتوفرة: يعني لو ما رحت على مدينة العقبة نفسها وظليت بالفندق رح تنام الساعة 8. لا شيء مميز في الليل (إذا اعتقدت ان راقصة شرقية بترقص وهي ظاربة بوز اشي مميز هاي مشكلتك)، ولا نشاطات للأطفال او اليافعين عشان يحلّو عن احم… اذنك، بشكل عام ما الك الا ترمي حالك بالبركة وتتشمس بس!
  3. الذباب… او بالأحرى الذبّان خاصة بالبحر الميت… اكلنا الذبان، و بتسأل الموظف كيف ممكن نخلص من الذبان بقوللك: عندنا نفس المادة اللي عند “جيرانا”… ممكن عندنا نفس المادة بس احنا شكلنا بنحلّها بتنك ميّ عشان اوفر
  4. السياحة الأجنبية: بعد ما “تحركشت” ببعض السياح الكل بقول: احنا جايين بالسفينة وبس زيارة كم ساعة، يعني كلها كم دينار بنصرفها عندكو وباي باي. في ناس بتنزل فترة أطول بس الحركة خفيفة- يمكن لأني نزلت بوقت “غير سياحي”
  5. نوع السياح: اموت وافهم ليش كل السياح كبار في السن! هو اهلا وسهلا بالجميع، واحنا عارفين انهم متقاعدين و بطلعلهم شمة هوا كل كم شهر (زي جمعية يعني) … بس يبدو الأردن مش بلد “فايع” للاعمار ما بين 25 الى 40 سنة (اذا احنا اهل البلد ظاربين بوز، ليش نجلط غيرناJ)
  6. الاكل: الشهادة لله- الاكل عندنا زاكي ليش الحكي! بغض النظر عما نسمع بالأخبار عن بعض الفنادق- بس بشكل عام مليح الاكل
  7. التعامل مع الأردني: صار معي موقف للأسف غير سار ابدا و اظن انه يعكس طريقة التعامل مع الأردني- حدث الموقف معي عند الدخول الى البتراء (عند مركز الزوار).. للعلم: انا “ابياضاني” وعلى حكي الناس مش مبين أنى عربي\أردني.. اللي صار كالتالي:
    1. عند شباك التذاكر: انا: تذكرة لاردني وبنت عشر سنوات (بنتي- مش وحدة ثانية لا يروح عقلك لبعيد).
    2. الموظف: هويتك لو سمحت.. كله تمام.. تذكرة بدينار ومجانية للبنت
    3. عند الحاجز أعطيت التذكرة للموظف (غير الأول طبعا)
    4. الموظف: انت أردني؟ انا: شو شايف يعني؟ التذكرة بدينار معناها انا أردني
    5. الموظف: فرجيني هويتك
    6. انا: ليش؟ مهو زميلك اعطاني تذكرة و شاف هويتي (لاحظ انا هون بلشت انكش مخي عليه).. المهم اعطيته الهوية
    7. الموظف: هو مرات في أردنيين بتخلو عن جنسيتهم لجنسية ثانية (زي المانيا) وبحكو عن حالهم أردنيين
    8. انا: !@$#%&^%$#@$%^$%^#$%#@$

 

وبالنهاية بقول: حوّش مصاري وشم هوا برا الأردن، حتى لو بـ****

Welcome to jordan

2 thoughts on “السياحة في الأردن- وجهة نظر شخصية

  1. للآن ما زرت لا البتراء ولا العقبة (فكرك عليها حجز “سحب” جنسية هالأيام؟) وبصراحة لم أسمع عن أي أحد (أحد: اللي عنده واحد أو أكثر من اللي ما بحلّو عنك) انبسط بالروحة للعقبة تحديدًا ما عدا شخص واحد (أردني). الأسعار وعدم وجود نشاطات غالبًا ما بيكون السبب. الغريب إنو الكثيرين بيرجعوا لنفس الفندق + نفس الروتين.
    (المسألة مش بس بالفلوس لأنه -على الأقل حاليًا كما فهمت) سياحة على شرم الشيخ أو تركيا بطلع راس براس تقريبًا.

    على كل ما أظن يصحلي أروح بالمستقبل القريب وشكلو حوش وروح مكان ثاني حيكون الخيار العقلاني و الأفضل.

    شكرًا

  2. أنا للصراحة دخلت مجال الفندقة والسياحة بالصدفة, مع أنه مش تخصصي, و بحس أنه من الضروري يسير في تطوير للسياحة بالأردن لأننا نفتقر للنشاطات و الفعاليات التي من الممكن أن تستقطب عدد كبير من الزوار و تساعد بانتعاش الاقتصاد بالبلد.

    نحن الحمدلله في عنا أيدي عاملة لو قمنا بتدريبها, ممكن نسير أحسن.

    منفتخر أنه عنا مطاعم أردنية محتلة السوق و بنراح عليها أكتر من المطاعم الأجنبية. و الحمدلله زي ما تفضلت انه الأكل عنا مليح.

    لو يسير في شركات أو مؤسسات تعمل برامج سياحية أو ترفيهية, على سبيل المثال كل يوم يزوروا منطقة و يخيموا في الأردن, و يسير في اعلام و تسويق مرتب, ممكن انه نتحسن.

    نحن دائما ممكن نطور من حالنا اذا عرفنا شو نقاط ضعفنا و حولناها لنقاط قوة. بس اذا كل واحد رح يهرب من البلد بسبب التطفيش و العوائق يلي منواجها, ما رح يسير اي شي.

    هذا رأيي الشخصي و المتواضع

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s